V.S KUNDËR A.SH, VENDIMI Nr. 9538, datë 24.11.2016, PUSHIMIN E CENIMIT TË TË DREJTAVE TË PRONËSISË INDUSTRIALE QË RRJEDHIN NGA MARKA TREGTARE DHE NDALIMIN E MËTEJSHËM TË PËRDORIMIT TË SAJ.
Objekti i padisë: Pushimi i cenimit të të drejtave të pronësisë industriale nëpërmjet ndalimit të të paditurit të përdorë markën Victoria's Secret gjatë ushtrimit të veprimtarisë tregtare, pa autorizimin e paditësit, duke përfshirë edhe përdorimin e saj për qëllime marketingu, reklamimi ose publiciteti. Ndalimi i të paditurit të ofrojë shërbime me markën Victoria's Secret. Heqja dhe bllokimi i objekteve që përbëjnë shkelje të të drejtave të pronësisë industriale, si dhe ndalimin e veprimeve të mëtejshme të të paditurit që përbëjnë shkelje të këtyre të drejtave.
Gjyqtari: R.M
Fjalët kyç: pronësi industriale, markë tregtare, dizenjo, logo, emërtim i regjistruar si markë, emër tregtar, veprimtari tregtare, konkurrencë e pandershme, shenjë, konfondim i konsumatorit.
pronësi industriale, markë tregtare, dizenjo, logo, emërtim i regjistruar si markë, emër tregtar, veprimtari tregtare, konkurrencë e pandershme, shenjë, konfondim i konsumatorit.
Ligji dhe dispozitat ligjore përkatëse: Nenet 638, 639 të Kodit Civil, neni 348 i Kodit të Procedurës Civile, neni 6 i Konventës së Parisit “Për mbrojtjen e Pronësisë Industriale”, si dhe nenet 156, 158, 184/a, 184/b të ligjit Nr. 9947/2008 “Për pronësinë industriale”, i ndryshuar.
Faktet kryesore:
Paditësi është shoqëri tregtare amerikane e krijuar në SHBA më datë 29 janar 2011, me seli në Delaware SHBA. Ndërsa pala e paditur, sipas të dhënave të regjistrit tregtar të Qendrës Kombëtare të Biznesit ka një dyqan tregtie me pakicë dhe shumicë të mallrave konfeksione, këpucë, galanteri, bixhuteri, parfumeri etj., përpara Shkollës 9-vjeçare “Edit Durham” Tiranë. Emri tregtar i tij është V. Secret.
Pala paditëse ka të regjistruar që më datë 02 dhjetor 2014 markën tregtare nr. 4, 469, 269 dizenjon: me shkronja të arta dhe të mëdha “VICTORIA’S SECRET” në mes të një fushe me kolona në ngjyrë të rozë të errët dhe rozë të hapur, pjesë përbërëse e markës. Kjo markë është regjistruar në Zyrën e Patentave dhe Markave tregtare të SHBA me afat mbrojtje 10 vite.
Paditësi ka të regjistruar edhe markën me nr. 8868895 nga data 06.04.2006 për 10 vjet, që përmban “VICTORIA’S SECRET” dhe nën këtë markë përfshihen sapunë, larës për linzheri dhe produkte si shampo, kolonjë, parfum, ujë parfumi, vajra esenciale, veshje të jashtme për femra dhe meshkuj, të brendshme, linzheri, kimono, këmishë etj., ndërsa në Shqipëri është regjistruar me markën 2006/26 Gaz., më datë 03 gusht 2006.
Sipas ekstratit të QKB-së, por dhe fotove të kryera nga paditësi dyqanit të të paditurit rezulton se, ky i fundit tregton veshje dhe të brendshme femrash (njësoj si marka Victoria’s Secret e mirënjohur si markë në këtë fushë). Gjithashtu, dyqani ka të vendosur në krye emrin Victoria’s Secret dhe nën këtë emërtim në pjesën ballore e anësore të dyqanit janë vijat rozë ngjyrë të hapur dhe të errët, dizenjo kjo përsëri e regjistruar nga paditësi në SHBA.
Paditësi i dërgon një letër të paditurit më datë 26 gusht 2014 me arsyetimin se ka shkelur ligjin nr. 9478/2008, dhe brenda 10 ditëve e ka ftuar për të negociuar duke ndërprerë shitjen e veshjeve dhe produkteve të Victoria‘s Secret. I padituri ka marrë dijeni të rregullt nga lajmërim-marrjet postare, por nuk ka reaguar nga paralajmërimi, nuk ka hequr logot dhe dizenjot e markës tregtare nga dyqani i tij si, si dhe sot e kësaj dite vazhdon të njëjtin aktivitet.
Paditësi pretendon se: ka cënim të së drejtës së markës tregtare dhe, për këtë arsye, kërkon nga pala e paditur, personi fizik tregtar A. SH, që të heqë nga dyqani ku ushtron veprimtarinë tregtare tabelën me emërtimin “VICTORIA’S SECRET”, si dhe të mos e përdor më në të ardhmen për qëllim marketingu, fitimi etj. Gjithashtu, paditësi kërkon që i padituri të mos e përdorë më emërtimin “VICTORIA’S SECRET” si shenjë reklamuese, dalluese të veprimtarisë së tij tregtar dhe të veshjeve intime që ai tregton.
I padituri nuk u paraqit në asnjë seancë gjyqësore ndonëse kishte dijeni të rregullt me shpallje publike. Në gjykim gjykata thirri kryesisht edhe personin e tretë Drejtorinë e Përgjithshme të Markave dhe Patentave Tiranë, si dhe Avokaturën e Shtetit, Zyra Vendore Tiranë.
Vendimi:
Gjykata e Shkallës së Parë Tiranë ka vendosur pranimin e padisë, pushimin e cenimit të të drejtave të pronësisë industriale duke u ndaluar që në dyqanin e të paditurit me emrin Victoria's Secret të përdoren fjalë, dizenjo dhe figurë të markës tregtare Victoria's Secret për efekt tregtimi të mallrave, marketingu pa autorizim të paditësit. Me shpenzimet e të paditurit të hiqen të gjitha elementët e markës tregtare që ndodhen në dyqanin e tij si, fjalë, logo, vija, dizenjo etj. Detyrimin e të paditurit që në të ardhmen të mos ofrojë asnjë shërbim, veprimtari tregtare marketing, dizenjo dhe sende që i përkasin markës tregtare të paditësit Victoria's Secret Stores Brand Managment Inc.
Arsyetimi i gjykatës:
Pronësia industriale gëzon një mbrojtje sipas nenit 42 të Kushtetutës por edhe të nenit 1 të Protokollit Nr. 1 të KEDNJ, njësoj si një pronë “e paluajtshme” apo “e luajtshme”. Në momentin që regjistrohet në regjistrat përkatës kombëtar apo ndërkombëtar lindin të drejta për pronarin dhe detyrime për të tretët.
Rezulton se paditësi ushtron veprimtarinë e tij në fushën e linzherisë, të brendshmet e femrave por jo vetëm. Të njëjtën veprimtari ka zgjedhur të ushtrojë edhe pala e paditur A.Sh. Duke përfituar nga njohja ndërkombëtare që ka Victoria’s Secrets edhe emrin tregtar të tij e ka vendosur V. Secret. Ndërsa në dyqanin ku shet të njëjtat konfeksione, mallra etj., është shenjë dalluese Victoria’s Secret dhe poshtë saj një sfond ngjyrë rozë me vije, vijë më të lehtë dhe rozë më të mbyllur, që janë të regjistruar edhe në Shqipëri edhe në SHBA ndërkombëtarisht me pronar paditësin “VICTORIA’S SECRET STORES BRAND MANAGEMENT INC.” Mbrojtja e kësaj logo dhe emërtimi sipas regjistrimit është për një periudhë 10 vjeçare, konkretisht për dizenjon me vija e cila është regjistruar me datë 2 dhjetor 2014, ndërsa për emërtimin në prill 2006. Data e ngritjes së padisë për mbrojtje të së drejtës së pronësisë është brenda këtij afati që gëzon mbrojtje ligjore. Sipas nenit 156§2 “b” të ligjit nr.9947/2008 për shkak të regjistrimit i pari të kësaj marke, pronari fiton pronësinë njësoj si mbi një send të luajtshëm a të paluajtshëm, si dhe ka të drejtë të ndalojë çdo person që përdor në ushtrim të veprimtarisë së tij tregtare shenjë të njëjtë a të ngjashme me markën e tij ku për shkak të njëllojshmërisë së shërbimit, konsumatori konfondohet.
Rezulton se, pala e paditur ushtron veprimtari tregtare, kjo e provuar nga ekstrati historik i QKB- së ku është regjistruar me emrin tregtar A.Sh person fizik, me fushë veprimtarie tregtare të njëjtë si pala paditëse, atë të tregtimit me pakicë të të brendshmeve për gra etj. Edhe nga fotot në dyqanin e tij përballë Shkollës “Edit Durham” Tiranë, ai ka një tabelë me emrin Victoria’s Secret, ku më poshtë në mënyrë vertikale nga të dyja anët e dyqanit dhe sipër tek pamja ballore janë vijat dhe emri të regjistruar si markë të saj tregtare të Victoria’s Secret Stores Brand Management Inc. Në vitrina ka sende të ndryshme kryesisht të brendshme dhe veshje femrash etj.
Gjykata vlerëson se edhe një shtetas me intelekt mesatar do të konfondodet kur në treg të shikojë dyqanin e të paditurit A. Sh me emrin VICTORIA’S SECRET, që duket se i takon të njëjtit Victoria’s Secret Stores Brand Management Inc. Emri i përdorur në dyqanin e të paditurit është identik me emrin e mbrojtur tashmë nga ana e paditësit prandaj për gjykatën, pala paditëse me të drejtë legjitimohet të kërkojë nga i padituri cenim të markës tregtare dhe mospërdorim të mëtejshëm të saj. Kjo ngjashmëri vjen nga emri Victoria’s Secret, i cili ka të njëjtat shkronja, shoqëron mallra të njëjtë a të ngjashëm si ajo që janë mbrojtur me markën tregtare Victoria’s Secret, markë e mirënjohur kudo në botë.
Gjykata çmon se, plotësohet edhe kushti i konkurrencës së pandershme pasi malli është i njëjtë dhe me logon e përdorur njësoj, në një zonë afër me njëra tjetrën, rruga e Kavajës me rrugën e Durrësit në Tiranë.
Gjithashtu, për shkak të reklamimeve të shpeshta të Argjendari dhe Suvenire Victoria’s Secret Stores Brand Management Inc. në televizione të ndryshme kombëtare shqiptare është evidente se, pala e paditur ka përfituar nga marka me reputacion të njohur në Republikën e Shqipërisë dhe ka zgjedhur të mbaj tabelën me emrin VICTORIA’S SECRET STORES BRAND MANAGEMENT INC., për të konfonduar konsumatorin me një markë të mëparshme të mirënjohur dhe për të joshur ata se sendet që shiten aty janë të prodhuara nga Argjendari Victoria’s Secret Stores Brand Management Inc.
Si përfundim gjykata e gjen me vend pretendimin e paditësit se kemi cenim të së drejtës së markës tregtare dhe për këtë arsye vendos që të detyrohet pala e paditur, personi fizik tregtar A. Sh, që të heqë nga dyqani dhe të mos e përdorë në të ardhmen tabelën me emërtimin “VICTORIA’S SECRET” për qëllime marketingu apo fitimi, si dhe të mos përdorë më emërtimin “VICTORIA’S SECRET” si shenjë reklamuese, dalluese në veshjet intime që ai tregton.