SHOQËRIA A. SHPK KUNDËR DREJTORISË SË PËRGJTHSHME TË MARKAVE DHE PATENTAVE, Nr. 10236, datë 16.12.2016, PËR REGJISTRIMIN E MARKËS ME NR. APLIKIMI KOMBËTAR AL/T/2013/693 ME APLIKANT SHOQËRINË “A” SHPK.
Objekti i padisë:
1. Shfuqizimi i aktit administrativ, Vendim i Bordit të Apelimit të DPPM nr. 693/7 Prot. datë 01.12.2015.
2. Detyrimin e palës së paditur, Drejtoria e Përgjithshme e Patentave dhe Markave, për vazhdimin e procedurave për regjistrimin e markës me nr. Aplikimi kombëtar AL/T/2013/693 me aplikant shoqërinë "A" shpk.
3.Detyrimin e palës së paditur Drejtoria e Përgjithshme e Patentave dhe Markave të kryejë publikimin përkatës në Buletinin e Pronësisë Industriale.
Gjyqtari: R.M
Fjalët kyç:
Markë tregtare, dizenjo, produkt, konsumator, mall, shërbim, konfuzion, pamje, fonetike,koncept.
Ligji dhe dispozitat ligjore përkatëse: Nenet 142, 143, 144, 152, 153, 156, 173 të ligjit Nr.9947, datë 7.10. 2008 “Për pronësinë industriale” i ndryshuar.
Faktet kryesore:
Paditësi është krijuar si shoqëri tregtare më datë 15 gusht 2006 me fushë të veprimtarisë së saj tregtimin me shumicë e pakicë të artikujve ushqimore dhe industriale, transport mallrash, tregtim me shumicë e pakicë, marketing, etj. Më datë 14 nëntor 2013, kërkuesi me aplikimin AL/T/2013/693 kërkon që të regjistrojë markën me fjalë Tropikal LEMON SODA dhe me figurë me dy limona, gjethe dhe me shiritë, sfond i zi dhe kombimin me ngjyrë të verdhë, portokalli, jeshile, e kuqe, e bardhë, e zezë (me klasifikim të mallit sipas Konventës së Nicës, nr. 32, pije joalkoolike). Personi i tretë, D.C spa, është shoqëri e të drejtës italiane, e cila prodhon dhe tregton pije alkoolike dhe joalkoolike. Për këto pije, personi i tretë ka regjistruar më datë 25 nëntor 2009, me nr. 12644 (me kohë fillimi mbrojtje që më 9 prill 2009) markën tregtare vetëm emrin ”LEMON SODA” e shkruar me dizenjo e zezë, e bardhë, e verdhë, gjelbër. Afati i mbrojties së kësaj marke është 9 prill 2019. Më pas, më datë 30 korrik 2012 është bërë aplikimi nr. Al/T/2012/000443 për të dyja elementët, emër dhe figurë në emër të personit të tretë: LEMON SODA dhe me ngjyra e zezë, e bardhë, e verdhë, e gjelbër, e stilizuar sipas klasifikimit të Konventës së Vjenës, gjethe, limona të mbivendosur për mallrat sipas klasifikimit të Nicës nr. 512 si birrë, ujra mineralë dhe të gazuar dhe pije joalkoolike, pije frutash, lëngje frutash, shurupë, produkte të tjera për përgatitjen e pijeve. Kjo markë tregtare ka mbrojtje deri më datë 30 korrik 2022. Emri i personit të autorizuar në Shqipëri është A.A. Më datë 03 korrik 2014, D.C spa, si pronare e markës me nr. 12644 e vitit 2009 dhe e markës me nr. 14716 e vitit 2012 ka paraqitur kërkesë për të kundërshtuar aplikimin e datës 9 prill 2014 të “A” shpk për të mos u regjistruar, pasi marka është identike dhe ka ngjashmëri, duke shkaktuar konfuzion tek konsumatori. Bordi i Apelimit, me vendimin e datës 1 dhjetor 2015, ka pranuar këtë kundërshtim, duke analizuar se: “Marka e kundërshtuar kërkon mbrojtie për të njëjtat mallra për të cilët është mbrojtur marka e mëparshme si dhe shkalla e lartë e ngjashmërisë mes tyre, e përforcojnë rrezikun e shkaktimit të konfuzionit të konsumatorit, përfshirë edhe mundësinë e bashkëlidhjes së tyre”. Më datë 5 janar 2016, “A” shpk kërkon të shfuqizohet ky vendimi i DPPM, Bordi i Apelimit dhe të vazhdohet me regjistrimin e markës me nr. Aplikimi AL/T/2013/693 me aplikant shoqërinë "A" shpk.
Paditësi pretendon se: mes të dy markave në të ardhmen do të ketë ngjashmëri të ulët në fonetikë, pasi vetëm Tropikal do të ketë mbrojtie ndërsa LEMON SODA nuk përfshihet në mbrojtje, logo është dy limona dhe gjethja e limonit, ndërsa marka Tropikal LEMON SODA është një shenjë komplekse me dizenjo tepër të dallueshme. Po ashtu, ka edhe marka tregtare me fjalën Cola dhe janë rregjistruar si Fresh Cola, Pepsi Cola, Coca Cola etj.
Pala e paditur pretendon se: ka ngjashmëri fonetike, konceptuale, mallrat klasës nr. 32 që ato mbrojnë, prandaj kërkohet lenia në fuqi e vendimit të Bordit të Apelimit.
Personi i tretë pretendon se: Lemon Soda është një markë e mirënjohur e për këtë duhet të zbatohet neni 4/4/a i Direktivës 2008/95/EC të Parlamentit Evropian dhe Këshillit. Marka LEMON SODA, fjalë dhe etiketë, janë regjistruar respektivisht me nr. 12644 dhe 14716 për klasifikimin e klasës nr. 32. Të tre aspektet themelore të krahasimit të markave tregtare, pamje, fonetikë dhe koncept janë të njëjta. Legjislacioni nuk e njeh konceptin e markave derivuese apo dytësore siç pretendon pala paditëse nga ku rrjedh marka Tropical edhe ajo LEMON SODA, madje ajo është shumë pak e dallueshme nga emërtimi LEMON SODA tek marka e pretenduar e paditësit.
Vendimi:
Gjykata ka vendosur rrëzimin e padisë së paditësit Shoqëria "A" sh.p.k., si e pambështetur në ligj dhe në prova; lënien në fuqi të vendimit të palës së paditur Drejtoria e Përgjithshme e Markave dhe Patentave për vazhdimin e procedurave per regjistrimin e markes me nr. Aplikimi kombëtar AL/T/2013/693 me kërkues paditësin "A" shpk; shpenzimet gjyqësore në ngarkim të palës paditëse.
Arsyetimi i gjykatës: Gjykata konstaton se në tre aspektet fonetik, pamor dhe koncept, por edhe funksional (qëllimin për të cilën ajo krijohet për të identikuar një mall a shërbim të klasës së kategorizuar nga Konventa e Nicës) vërehet se marka e pretenduar Tropikal LEMON SODA ka një ngjashmëri afër identikes me markën e regjistruar të “LEMON SODA” të personit të tretë D.C Spa. Nga pikëpamja fonetike, dy nga tre fjalët janë të markës së regjistruar. Pra, fjalët si shenjë nuk e bëjnë të dallueshme këtë markë potenciale nga marka e regjistruar LEMON SODA. Madje ashtu siç e ka paraqitur fjalën tropical, ajo është pak e dallueshme nga syri i konsumatorit dhe më të lexueshme janë fjalët LEMON SODA. Nga pikëpamja vizuale, marka që pretendohet nuk është aspak e dallueshme. Kemi kombinim të të njëjtave ngjyra, konkretisht katër ngjyrat e markës së regjistruar: e zezë, jeshile, e verdhë dhe e bardhë janë të përshirë edhe në markën potenciale të paditësit: e zezë, e verdhë, e bardhë, jeshile veçse ka shtuar portokallinë tek fjala “Tropical”. Po ashtu, elementët që përdor janë përsëri limon, gjethe, të vendosura në qendër, sipër tyre është fjala LEMON SODA me germa të mëdha njësoj si marka e regjistruar, duke e bërë që të mos dallohet nga një konsumator i zakonshëm dhe me kujdes mesatar për të identifikuar mallin. Elementët dallues të markës së regjistruar LEMON SODA, emri, figura etj. janë përdorur në mënyrë tepër të ngjashme afër identikes nga ana e paditësit, ndërsa detajet shtesë janë aq të vogla dhe periferike sa janë të padukshme për çdo konsumator që i kushton pak minuta në zgjedhjen e mallit. Sapo çdo person të shikojë një pije me markën LEMON SODA me dy limona, sfond të zi e konfondon me markën e mëparshme duke i krijuar një konkurrencë të pandershme personit të tretë.
Nga pikëpamja funksionale, malli që identifikon marka që kërkohet të regjistrohet është identike me mallin që identifikon marka e regjistruar LEMON SODA e personit të tretë, në klasifikimin e Nicës, nr. 32, pije freskuese.
Gjykata çmon se marka tregtare e aplikuar nga ana e “A” shpk është tepër e ngjashme, në kufijtë e identikes me markën tregtare të personit të tretë D.C spa, me afat mbrojtie deri në 2019. Për këtë arsye, dhe referuar nenit 143§1 shkronja “b” e ligjit të posaçëm duke qenë se ajo nuk dallon asnjë mall a shërbim në mënyrë të veçantë nga marka e personit të tretë, ka shkaqe relative për t’u refuzuar regjistrimi i saj, prandaj me të drejtë Bordi i Apelimit të DPPM e ka pranuar kundërshtimin e regjistrimit dhe ka ndërprerë proçedurën e mëtejshme.