V SHPK KUNDËR DREJTORIA E PËRGJITHSHME E PRONËSISË INDUSTRIALE TIRANË DHE SHOQËRIA A.B SHPK., VENDIMI nr.2428, datë 16.10.2020 PËR SHFUQIZIMIN E VENDIMIT NR.257/11 PROT. DATË 17.12.2019 TË BORDIT TË APELIMIT TË PALËS SË PADITUR DPPI.
Objekti i padisë: Konstatimi i paligjshmërisë dhe shfuqizimi i vendimit nr. 257/11 prot. datë 17.12.2019 të Bordit të Apelimit të palës së paditur DPPI. Lënia në fuqi e vendimit nr.257/6 prot. datë 25.07.2019 të Dhomës për shfuqizim/zhvlerësim të DPPI. Detyrimi i të paditurit DPPI të shfuqizojë të gjitha regjistrimet e kësaj marke për të paditurin A.B shpk., si dhe të publikojë vendimin gjyqësor në buletinin e publikuar prej saj. Ndalimi i përdorimit apo publikimit të markës së regjistruar me emrin NG nga i padituri A.B shpk.
Gjyqtari:
Fjalët kyç:
Pronësi industriale, markë, regjistrim, procedurë administrative, pezullim, organ publik
Ligji dhe dispozitat ligjore përkatëse: Ligji 49/2012 “Për organizimin dhe funksionimin e Gjykatave Administrative dhe gjykimin e mosmarrëveshjeve administrative” i ndryshuar, nenet 66, 67 dhe 136 të Kodit të Procedurave Administrative, dhe neni 143 i Ligjit nr. 9947, datë 07.07.2008 "Për pronësinë industriale" të ndryshuar.
Faktet kryesore:
Paditësi V shpk., regjistruar pranë QKB, ka për objekt veprimtarie formimin profesional në fushën e parukerisë. Referuar ekstraktit të QKB, paditësi është me status të pezulluar. Pala paditëse ka aplikuar pranë DPPI për të çregjistruar markën NG, regjistruar në emër të të paditurit A.B shpk. Dhoma për shfuqizim pranë DPPI me vendimin nr. 257/6., prot. datë 25.07.2019, ka pranuar kërkesën e paditësit.
Mbi ankimin e subjektit A.B shpk., Dhoma e Apelimit pranë DPPI ka marrë vendimin nr. 257/11., datë 17.1.2019, për pezullimin e procedurës administrative deri në dhënien e vendimit përfundimtar nga Gjykata e Lartë, lidhur me një mosmarrëveshje mes ortakëve të shoqërisë V shpk. Nisur sa më sipër, pala paditëse i është drejtuar me kërkesëpadi gjykatës, duke kërkuar shfuqizimin e vendimit të Dhomës së Apelimit si dhe detyrimin e palës së paditur DPPI për çregjistrimin e markës NG për të paditurin A.B shpk.
Paditësi pretendon se: duhet të bëhet çregjistrimi i markës NG për të paditurin A.B shpk. pasi është e ngjashme me një markë të mëparshme të përdorur nga V shpk. Ekziston mundësia e shkaktimit të konfuzionit të publikut pasi mund të perceptohet si markë e përbashkët për të dyja shoqëritë tregtare. Dhoma e Apelimit në DPPI nuk duhej të pezullonte procedurën administrative për shkak të shqyrtimit të një mosmarrëveshje mes ortakëve tanë nga Gjykata e Lartë. Mosmarrëveshja mes ortakëve nuk ndikon në procedurën administrative të iniciuar nga V shpk. lidhur me çregjistrimin e markës tregtare GN.
Të paditurit pretendojnë se: procedura administrative për shyrtimin e ankesës për çregjistrim pranë DPPI duhet të pezullohet deri në dhënien e vendimit përfundimtar nga Gjykata e Lartë lidhur me një mosmarrëveshje mes ortakëve të shoqërisë V shpk., pra të palës paditëse.
Vendimi:
Pranimi i pjesshëm i kërkesëpadisë së paditësit V SHPK. Shfuqizimi i Vendimit Nr. 257/11., prot, datë 17.12.2019 i Dhomës së Apelimit të DPPI dhe detyrimin e palës së paditur të shqyrtojë në themel ankimin e subjektit V shpk. Rrëzimi i padisë për pjesën tjetër të kërkimeve.
Arsyetimi i gjykatës: Gjykata vlerëson se pala e paditur ka gabuar kur ka vendosur pezullimin e procedurës administrative deri në dhënien e vendimit përfundimtar nga Gjykata e Lartë, lidhur me një mosmarrëveshje mes organeve të paditësit V shpk. Në Gjykatën e Lartë, objekt shyrtimi janë konfliktet mes ortakëve të shoqërisë, ndërsa pranë Dhomës së Apelimit në DPPI objekt shqyrtimi është vendimi i Dhomës së Zhvlerësimit për çregjistrim të një marke, vendim i cili është në interes të palës paditëse V shpk. Pra, gjykimi i cili është vlerësuar si shkak pezullues në fakt nuk ndikon fare në procesin administrativ që është në pritje të shqyrtimit në Dhomën e Apelimit.
K.Pr.Administrative parashikon shprehimisht rastin kur mund të pezullohet një procedim administrativ, konkretisht kur organi publik që zhvillon procedurën përballet me një çështje, zgjidhja e së cilës është parakusht për zgjidhjen e procedurës. Ky trup gjykues vlerëson se në rastin konkret, zgjidhja e mosmarrëveshjes në Gjykatën e Lartë, nuk përbën dhe nuk duhet të vlerësohej si parakusht për zgjidhjen e procedimit administrativ. Çështja nëse duhet të bëhet çregjistrimi në emër të A.B shpk. është thellësisht ligjore dhe nuk ka koneksitet me përfundimin e gjykimit në Gjykatën e Lartë. Vendimi i Dhomës së Apelimit pranë DPPI është i pabazuar në ligj e në fakt, si i tillë duhet të shfuqizohet.
Lidhur me kërkimet e tjera të padisë, gjykata çmon se paditësi nuk legjitimohet t’i kërkojë në këtë gjykim për sa kohë që nuk ka një vendim përfundimtar të organit administrativ apo për sa kohë që nuk ka kaluar afati i parashikuar në ligj brenda të cilit organi duhet të shprehet me vendim. Dhoma e Apelimit në DPPI nuk ka dalë me vendim përfundimtar por me një vendim të ndërmjetëm për pezullim procedure. Për pasojë, paditësi nuk ka interes të ligjshëm për të mbrojtur kërkimet e tjera në këtë proces. Pra, duhet ezauruar e gjithë procedura administrative pranë organit publik në mënyrë që paditësi t’i drejtohet gjykatës për kërkimet e tjera.